نفسي أقول لِك ألف حاجة بس آه لو تفهميني

سيمفونيات الـ (تكتكه) !

بما أنى عاشق لكل ما يمت للكمبيوتر والإنترنت , والمجتمعات البديله والفضاء السيبرى ... وأى حاجه فيها زراير عموما , تلاقينى بقيت زبون دائم عند أصحاب السايبرات ومكاتب تقديم خدمات الإنترنت ... وفى مدينه صغيرة زى مدينتنا , ومع إنسان بتفرض عليه طبيعه دراسته وحياته التنقل فى كل مكان ... بقيت فى فترة قليله معروف عند معظم مكاتب الكمبيوتر وشركات الإنترنت , والسايبرات ...ومع الوقت بقيت حافظ فى كل سايبر أحسن الأجهزة عندة ... وأحسن الكراسى .. ومع الوقت ظهر عندى إهتمام خاص بوحدة مهمه فى أى كمبيوتر هى الكيبورد Keyboard والى إكتشفت أنها من الوحدات المهمه جدا فى الكمبيوتر , والى أى خلل أو عيب فيها كفيل إنه يفسد على الإنسان متعه التعامل والتواصل مع الكمبيوتر ...ويمكن أكون كتبت فى الماضى عن عشقى للكمبيوتر كله إلا أنه يظل عشقى الأخير للكيبورد وبدأت علاقتى مع الكيبورد من بدايه إقتحامى لعالم الإنترنت ... كنت بقعد فى أى سايبر وأنا مش فاهم أى حاجه فى أى حاجه , وكان معيار حكمى على مدى براعه أى شخص فى التعامل مع الكمبيوتر هو من سرعته فى الكتابه على الكيبورد , وكنت بتمنى إنى أقدر أكتب ولو مرة واحدة إسمى منغير مبص على الكيبورد ولا مرة وكان دة تحدى كبير بالنسبه لى ....إلا أن سرعتى فى الكتابه على الكيبورد إكتسبتها فى وقت قياسى .. تقريبا بعد 3 أيام من الشغل على الكمبيوتر قدرت أوصل لسرعه معقوله , أما الكتابه بدون نظر فدة إكتسبته بعد سنين من الشغل المتواصل ... وبعد كتير من المواقف المضحكه فى البدايه .... مثلا جت لى فترة كنت واثق إن الكيبورد مفيهاش حرف ( ذ ) ودة طبعا بسبب وضع الحرف دة فى مكان بعيد عن باقى الزراير ... وكنت بعمل خبير وأنا بشوف الكيبوردات وأقول لصحاب السايبر " هو الكيبوردات عندك فيها ( ذ ) ولا لاء " وطبعا مكنتش ببقى فاهم سبب ضحك كل الموجودين

بعدها نشأت علاقه حب كبيرة بينى وبين الكيبورد حسيت إن الكيبورد دى هو وسيلتى فى نقل شعورى ... ترجمه أفكارى لكلمات توصل للناس فى أى وكل مكان .. ساعد على دة إن خط إيدى أو الـ Handwriting بتاعى مش حلو , وإن الكيبوردات ملهاش خطوط ( إلا لو غيرت الـ Font ودى قصه تانيه ) وبالتالى لقيت فى الكيبورد وسيله تانيه للتعبير غير الإضطرار للكتابه ..ومع الوقت بقيت أعشق صوت ( تكتكه ) زراير الكيبورد ... وأصبح عندى هوس بالحكايه دى ... ويمكن الى يشوفنى وأنا بشترى أى كيبورد يستغرب وأنا بطلعها من كيسها وبلمسها بإيدى ... أمرر صوابعى على زرايرها ... فيه حوار بيتم بين إيدى وبين الكيبورد ... ومش بشترى غير الكيبورد الى بتنجح فى الحوار دة مع إيدى ... دة غير إنى لسه محتفظ بأول كيبورد إشتريتها فى حياتى ... وعموما مش بستغنى عن أى كيبورد إشتريتها فى يوم .ودلوقتى أصبح السؤال الأساسى ليا فى أى سايبر هل الكيبورد بتاعه الجهاز كويسه ولا لاء ؟ لإن لو الكيبورد مش كويسه دة شىء كفيل إنه يبوظلى كل حاجه حلوة بفكر أعملها .العزف مش على بيانو وأورج وبس .... العزف مش الحان وبس ... العزف ممكن يكون على الكيبورد ... سيمفونيات من تكتكه الكيبورد ... وألحان من الكلمات الى بتكتبها الكيبورد ..من كام يوم كنت فى سايبر ... وقعد جنبى على الجهاز شاب شكله لسه جديد فى الشغل على الكمبيوتر ... فتح الجهاز وقعد مش قادر يشتغل على أى حاجه ... بص للولد المسئول عن السايبر وقاله :

- " لو سمحت هو مفيش عندك كيبورد عليها حرف ( ذ ) ؟

إنفجر كل الموجودين فى الضحك إلا أنا ... ومنغير متكلم شاورتله على الحرف بهدوء